Бұл туралы бүгін ҚР Денсаулық сақтау министрлігі Қоғамдық денсаулық сақтау департаменті басшысы Нұрқан Сәдуақасов хабарлады
Астана қаласы Департаменті былтыр санитарлық-эпидемиологиялық сараптама өткізу үшін 129 сауда және қоғамдық тамақтану орындарында 3237 азық-түлік және тұрмыстық өнімдерге зерттеу жүргізген. Оның 17 пайызы ЕАЭО техникалық регламентіне сай болмай шыққан.
Бұл өнімдердің 45 пайызынан таңбалау бойынша талаптарды бұзу фактісі тіркелген. Оның ішінде тұтынушыны алдау оқиғалары көп. Мәселен, құрамында шошқа ДНК-сы, ГМО немесе соя бар екенін жазбай, тұтынушыны жаңылыстыру көрсеткіші – 13 пайызға тең болған.
«Тұтынушылар, көбінесе, ет өнімдерін сатып аларда алданып қалады. Ресейлік және отандық өндірушілер оның құрамын толықтай көрсетпейді. Жұмыс барысында ет өнімдерінің 54 сынамасынан шошқа ДНК-сы анықталды. Оның 11 сынамасы ресейлік, ал қалған 43-і қазақстандық өндірушілерге тиесілі. Тиісті шараларды қабылдау үшін Астана қаласы ІІД-не 3 хат жолданды», - дейді Департамент басшысы Нұрқан СӘДУАҚАСОВ.
Жаңғақ пастасы, бидай крекерлері, құлпынай тортына арналған дайын қоспа, АҚШ өндіретін картоп сорпа-езбесінің құрамынан ГМО анықталған. Тұтынушыларды алдау фактісі сүт өнімдері бойынша да тіркелген. Санитарлық талаптарды бұзу бойынша деректерге келсек, Грузияда дайындалған лимонадта бензоил қышқылы шамадан тыс жоғары болса, Қырғызстаннан тасымалданған шырын өнімдерінен де сәйкессіздік табылған.
Оған қоса, микробиологиялық көрсеткіштер бойынша сәйкессіздіктер қырғызстандық «АТА» кондитерлік фабрикасы мен «Қағанат» асханасы, «Асыл нан» ЖШС, «Нұр-Әділ» ЖК өнімдерінен тіркелген.
Азық-түліктен бөлек, Департамент басшысы ата-аналарды балалар ойыншықтарын таңдауда өте абай болуға шақырады.
«Астана қаласында зерттеу үшін сатып алынған ойыншықтардың таңбалау бөлігінен заң бұзушылықты көрдік. Ол ойыншықтардың 80%-ы Қытай, Ресей, Өзбекстан, Беларусь Республикасы мен Қырғызстаннан келеді. Ата-аналар, балаларыңыз үшін ойыншық алатын кезде оның құрылым материалы, жас бойынша шектеулері мен өндіруші компанияның белгісіне мән беріңіздер. Базарларда ойыншықтың қауіпсіздігін растайтын құжатын, сәйкестік сертификатын сұраңыздар», - деді Нұрқан ОЛЖАБАЙҰЛЫ.
Департамент басшысы халыққа сырттан тасымалданатын алмаларды пайдалану бойынша да кеңес бере кетті.
«Оларды ұзақ мерзімге сақтау үшін өндірушілер не нәрсеге де дайын. Сонау алыстан алып келу, сақтау оңай емес. Біз, әрине, зерттеу жүргіземіз. Бірақ барлық тауарға емес. Сондықтан мұндай алманы жылы суға жуып, егер дәмі ұнамай тұрса, сыртын аршып жеген дұрыс.
Баяндаманың басынан соңына дейін азық-түлік сатып аларда абай болуға шақырған Департамент басшысы жергілікті алмаға қатысты «Қорықпаңыздар, жергілікті алмадан ешқандай қауіп жоқ. Өзім сыртымен қосып жеймін» деді.
2017 жылы Астана қаласы бойынша азық-түлік және тұрмыстық шаруашылық өнімдері сапасын тексеру кезінде жалпы 3 834 610 теңгеге айыппұл салынған екен.
Фото: all.biz, автордікі.
