Көкшетауда жергілікті билік атажұртқа келген 200-ден аса отбасын баспанасынан айырмақ
Президенттің «Нұрлы көш» бағдарламасы арқылы Көкшетауға көшіп келген екі жүзден астам отбасы баспанасыз қалуы мүмкін. Өйткені, олар бірнеше жылдан бері жалдамалы пәтерлерінің ақшасын төлемей келеді. Жағдай осылай жалғаса берсе, шара қолдануға мәжбүр боламыз дейді жергілікті басшылық. Алайда, тұрғындардың өз айтары бар. Баспанамыз тым сапасыз деген олар бүгін-ертең үйіміз қирап жатса, миллиондаған ақшамыз көкке ұша ма деген уәж айтады.
Көкшетау қаласының құрамына кіретін Красный Яр қалашығының іргесінде оралмандарға арналған ауылдың үйлері 2009 жылдың қараша айында беріле бастаған. 138 қоржын үйге бюджеттен 1 млрд аса теңге бөлінген еді. Сол кездегі Еңбек және халықты әлеуметтік қорғау министрі Гүлшара ӘБДІХАЛЫҚОВА атажұртқа келген қандастарымызға салтанатты түрде баспаналарының кілтін тапсырған еді. Қазір бұл жерде 250 отбасы тұрып жатыр. Амал нешік, арада бар-жоғы тоғыз өтпей жатып, Елбасының атына ұқсатып қойған «Нұрлы жол» бағдарламасы аясында «Нұрлы жол» атанған ауыл қаңқырап қалудың алдында тұр.
- Осы үйге кірген жылы-ақ сапасыз салынғандығы белгілі болды. Алғашқы жауында төбеден су ақты, соққан жел керегеден өтіп кетті. Былтыр әйтеуір тұрып жатқан жеріміз жылы болсын деп майда-шүйде жөндеу жұмыстарын жасадық.Соған миллионнан артық қаражат кетті.Үй жылымайды. Балаларым жататын үйге тоқ қосып қоямыз. Балалардың бәрі гриппен ауырып жатыр шетінен, - дейді Бөрігүл ШАДАМБАЕВА президент тапсырмасымен салынған үйдің сапасыздығына күйініп.
«Нұрлы көштегі» бір баспана шамамен, 25-30 мың доллар тұрады. Бұл үйлердің сапасыздығына қарамай алам дейтіндер де бар. Тек, қолбайлау болып тұрғаны үйлердің құжаттары дұрыс емес. Қолдарына үйдің техникалық құжаты берілмегеннен кейін жұрт 6 жылдан бері пәтер ақысын да төлемей қойыпты. Өйткені, ақшамыздың қайда кетіп жатқанын білмейміз дейді.
- Үйімізге күрделі жөндеу жасайық десек, құжаты болмағандықтан қорқамыз. Ертең үйді кері тартып алса ше? Қабырғалар жұп-жұқа. Көршілерімізбен екі ортадағы қабырғаның қалыңдығы екі бөлменің ортасындағы қабырғадай ғана. Сәл сындырса, көршілерге өтуге болады, - Балжан ДӘУІТОВА Нұрлы көш ауылының тұрғыны
Тұрғын үй коммуналдық шаруашылығы бөлімінің басшысы Марат ЖҮНІСОВТЫҢ айтуынша, мемлекеттік бағдарламаның талабын орындамай отырған тұрғындардың өздері кінәлі. Мәселе жақын арада шешілмесе, қарызы барлардың үйлерін босатуларына тура келеді.
- «Нұрлы көш» бағдарламасының талабына сай олар алдымен, баспана құнының 50 пайызын өтеу керек. Содан кейін тұрғын үй құрылыс жинақ банкінен шот ашып, қалған 50 пайызын жинаулары тиіс. Сол кезде ғана біз оларға техникалық құжаттарын бере аламыз. Оның барлығы тұрғындарға түсіндірілген. Алайда, екі жүзден астам отбасының ешқайсы да бұл талапты орындаған жоқ. Талапты әрі қарай да орындамайтын болса, шара қолдануға мәжбүр боламыз, - дейді Көкшетау қалалық тұрғын-үй коммуналдық шаруашылығы бөлімінің басшысы Марат ЖҮНІСОВ.
Фото автордікі.
