Елорда тұрғындарын жабық бульвар жобасын қаржыландыруға шақырды
Астанада салынатын жабық бульвар инвестициялық жоба болмақ. 7-8 мыңдық автотұрақ салынатын көп функциялы кешенге бюджеттен бір тиында бөлінбейді екен. Бұл туралы «Astana» ӘКК ҰҚ АҚ Басқарма төрағасының орынбасары Бауыржан КАНКИН Астана радиосына берген сұхбатында мәлімдеді.
Алайда, Б. Канкин мырза бұл жобаға елордалықтарды ат салысуға шақырды. Канкин мырзаның пікірінше, әрбір астаналық өз ақшасына бір дүниені тұрғызғысы келетін арманы бар. «Жасыл-желекті жабық бульвар жобасы» арқылы сол армандарды орындауға болады екен.
Көпшіліктің арманын білетін Бауыржан Канкин мырза: «Барлығы түсінуі керек. Бұл қызық жоба. Түрлі бизнестер шоғырланады. Дәл осы орын Астанамыздың тарихы. Коммерциялық тұрғыдан қарағанда мәселе жоқ. Бұл өте қызықты ұсыныс! Бәлкім, әрбір астаналықтың өз қаражатына бір нәрсе салғысы келетін арманы бар шығар. Бірақ та адамдар бұл жобаны 100 пайыз инвестірлер қаржыландыратынына күдік келтірмеулері керек», - деді.
Өз басым Б. Канкинның сөзін ағайын асарлатайық деп түсіндім. Әрине, ол кісі ойын мәдениетті һәм астарлы жеткізді. Жалпы, соңғы кезде халықтың қалтасындағы ақшаға көз салу жастардың тілімен айтқанда трендке айналып кеткендей. Өткен аптада ғана бір облыстың білдей әкімі халықтың депозиттегі ақшасы арқылы тұрғын үй жобасын аяқтайық дегені бар. Қош, жабық бульварға қайта оралайық. Канкин мырзаның тағы да сөзіне сүйенуге тура келеді. Бұл ғаламат жоба іске асса Астана тұрғындары арқаның суығында тон кимей-ақ қала көшесін аралауға болады екен.
«Жоба коммерциялық. 7-8 мыңдық автотұрақты жоспарлап отырмыз. «Изумрудный» бизнес-орталығынан шығып, қыстың күні тек костюммен Ақорда немесе Хан Шатырға дейін серуендей алатын боламыз» - деген енді Бауыржан Канкин.
Арқаның аязы қыстың күні әбігерге салатыны даусыз. Бас шаһарды жылытудың өзіне аз қаражат кетпейді. Боранның кесірінен мектептер тоқтап қалып, оқушылардың үйден шыға алмай қалатынын бәріне мәлім. Астананың алай-дүлей боранында тек костюммен жүруге жағдай жасаса керемет қой! Тек, шынында да 100 пайыз инвестициялық жоба болуын тілейсің. Айтпақшы,басты құрлыста сәттілік жолдас болса игі.
2015 жылы құны 10 миллиондық жылы аялдамалар орнатылды. -30 градус суыққа арналған аялдамалар арқаның қысы келмей жатып сыр берді емес пе. Есіктері жабылмай қалды, аялдама іші жылымады. Әрине, әрбір Қазақстан азаматы астанасының көркейуіне, әсемдене түсуіне мүдделі. Бірақ дайын аялдаманы орната алмай қиналғанда мынандай ғаламат жобаны жасауға дайынбыз ба деген сауал алдыңнан шығады екен.
Бұл жобаның басында тұрғандар Канаданың Торонто қаласындағыда жабық көшелері сынды бізде де аяздан жауратпайтын бульвар болса дейді. Дамыған елдердегі игілікке деген ұмтылыс, әрине, қуантады. Алайда, ел арманы мен ел басқарушылардың арманы ортақ болса дейсің.
2013 жылы Астана тағы бір «арманға» қол соғып көрген еді. Қыста шаңғы тебу үшін, жыл он екі ай соғатын желге ықтасын болсын деп жасанды тау салу идеясы айтылған. Голландияда тау салу мәселесі талқыланып жатыр. Берлинның маңайынан тау соға бастады деп әңгімені гөй-гөйлетпедік пе. Тіпті жасанды таудың шығыны 40-50 миллион доллар болатынын да есептеп тастағанбыз. Бұл да астаналықтардың «арманы» еді. Орындалмады. Шын армандар орындалса екен!
