Қазақстан БҰҰ шешімдерін орындауға бет алды ма?
Қазақстан Жоғарғы сотының азаматтық істер бойынша сот алқасы 14 ақпан күні Анна БЕЛОУСОВАНЫҢ ісін Астананың Сарыарқа аудандық сотына қайта қарауға жолдады. Сот алқасының төрағасы Елис ӘБДІҚАДЫРОВ судьялар 2016 жылы БҰҰ-ның әйелдерді кемсітуді тию комитеті қараған Белоусованың ісін «бұдан да кеңірек, тыңғылықты және толықтай қарау керек» деп ұйғарғанын айтты.
Еске сала кетейік, Қостанай облысы Перцовка ауылының 35 жастағы тұрғыны Анна Белоусова мектепте гардеробшы болып істеген. Оның сөзіне қарағанда, мектеп директоры одан «өзімен төсектес болуды талап еткен, әйтпесе жұмыстан шығаратынын айтқан».
Ол ұсыныстан бас тарқан Белоусовамен келісімшарт жаңа жылға ұзартылмай, ол жұмыссыз қалған. Осы оқиғадан соң ол қалалық білім бөлімі мен полицияға шағым түсірген. Алайда бұл мекемелердің ешқайсысы тергеу бастамаған, қылмысты тексеруге тырыспаған. Анна Белоусова Қазақстандағы барша соттардан өтіп, ешбірінен қолдау көрмей, 2012 жылы Адам құқығы бюросының Қостанайдағы филиалы көмегімен БҰҰ-ның әйелдердің кемсітуді тыю комитетіне арызданған.
2015 жылы Анна Белоусованың Қазақстанға қарсы ісіне байланысты, БҰҰ Әйелдерге қатысты кемсітушіліктің барлық түрлерін жою туралы конвенция бойынша шешім шығарып, Қазақстан мемлекетіне ұсыныс жасаған болатын. Ұсыныста еңбек қатынастары кезінде сексуалды алымсақтықпен күресу үшін, Қазақстанның ұлттық заңнамасына кідіртпестен, Комитеттің № 19 жалпы ұсынысына сәйкес, халықаралық норма мен стандарттарға сай келетін жұмыс орнындағы жыныстық бопсалау анықтамасын жалпы қамтитын ұғымды енгізіп, тиімді түрде шағым жазу және қарастыру тетіктерін, құқықтық қорғау және санкциялау құралдарын енгізуді ұсынды.
Фото: time.kz, naryk.kz.
