Ереуілдеткен "Шахтинск", "Ленин атындағы" және "Тентек" шахтасындағы барлық кеншілер жер астынан шыққан
Түнгі сағат 1.00 бірнеше күн бойы жер астында болған ереуілші шахтерлер кенжардан шықты, деп хабарлайды "АрселорМиттал Теміртау" АҚ баспасөз қызметі.
"Бүгін түнде, 15 желтоқсанда, "Шахтинск", "Ленин атындағы" және "Тентек" шахталарындағы барлық шахтер жер бетіне шықты. Қазір "Қазақстан" шахтасындағы кеншілер шығарылып жатыр", — делінген компания хабарламасында.
"АрселорМиттал Теміртау" АҚ төрт шахтасының жұмысшылары 11 желтоқсанда жұмыс ауысымы аяқталған соң кенжардан шықпай қойғаны белгілі.
Жұмысшылармен келіссөз жүргізу үшін компания өкілдері келді. Шахтерлер бірқатар талап қойған, оның ішінде жалақыны көтеру және зейнет жасын төмендету бар.
14 желтоқсанда Шахтинск соты ереуілді тоқтатып, шахтерлерді жер астынан шығуға міндеттеді.
Сонымен қатар, Қарағанды облысы әкімінің баспасөз қызметі хабарлағандай, Ерлан ҚОШАНОВПЕН және «АрселорМиттал Теміртау» АҚ атқарушы директоры Вадим БАСИНМЕН кездесуден соң бірінші болып жер бетіне Қазақстан шахтасының кеншілері шыға бастаған.
"Сонан соң ізінше Шахтинск, Тентек және Ленин атындағы шахталардағы жұмыскерлер көтерілді. 01.00-ге қарай барлық кеншілер (420 адамға жуық) жоғарыда болды. Кеншілерге жұмыс берушілер ұсынған шарттар туралы айтылды: барлық жер асты қызметкерлеріне 30%-ға жалақыны көтеру. Жер бетінде жұмыс істейтін көмір кәсіпорындары қызметкерлерінің жалақысын көбейту мөлшерін алдағы келіссөздер барысында Келісу комиссиясы анықтайтын болады. Компанияның көмір департаментінің барлық жұмыскерлеріне еңбекақы көлемінде бір реттік сыйақы төленетін болады. Оған қоса, жұмыс берушілермен 15-ші желтоқсанды демалыс күні деп жариялап, жұмысқа 16-шы желтоқсаннан бастап кірісу туралы ұсыныс жасалды".
Кеншілер арасында Шахтинск қаласы прокурорының қолы қойылған хат таратылды. Хатта осы ереуілге қатысқаны үшін кеншілерді қылмыстық қудалаудан босату кепілдігі берілген. Сонымен қатар, прокуратура органы қажет болған жағдайда осы мәселеге қатысты құқықтық қолдау көрсетуге дайын екендерін білдірді. Құрамына ынталы топ мүшелері, кәсіподақ комитеттері, прокуратура өкілдері, шахталардың директорлары, сондай-ақ облыс және АМТ басшылығы енген Келісу комиссиясы шеңберінде кеншілер жұмыс берушімен әлі де келіссіөздерді жалғастырады.
