«АрселорМиттал Темиртау» компаниясы мен жұмысшылары арасында еңбек дауы басталды
Компанияның көмір департаментінің төрт шахтасының кеншілер тобы ауысым аяқталған соң, жұмыс орындарынан кетуден бас тарты. Шахтадан шықпай қойған олардың басты талабы жалақыны көбейту. Ratel.kz сайтының тілшісі Айман САҒАТАЙ «Казахстанская» шахтасына барған. Алайда журналситті ішке кіргізбеді. Тілшіміздің хабарлауынша, қазір келіссөздер жүріп жатыр. Шахтерлар 11 пункттен тұратын талаптарын Whats App мессенжері және әлеуметтік желілер арқылы таратқан.
Компания да шахтерлардың наразылық акциясын растап отыр. Алайда «АрселорМиттал Темиртау» жұмысшыларымыз ешқандай талап қойып отырған жоқ деп баспасөз мәлімдемесін жариялады. Сонда 200 кенші жер астынан неге шықпай отыр деген сауал туындайды.
«Дәл қазір 4 шахтаның түнгі аусымдағы 200 аса кеншілері жұмыс аяқталса да жер астынан шықпай отыр. Бұл рұқсат етілмеген заңсыз акция. Шахтерлар тарапынан шахты басшылығына, «АрселорМиттал Темиртау» әкімшілігіне ешқандай да ресми талап қойылған жоқ. «Қорғау» кеншілер кәсіподағынан да арыз түспеді», - делінген «АрселорМиттал Темиртау» компаниясының баспасөз мәлімдемесінде.
Ал әлеуметтік желілерде шахтерлар акциясынан мынадай видео тарап кеткен.
Шетелдік компания мен жергілікті халық арасындағы еңбек дауынан Қарағанды облысы әкімдігі де хабардар екен. Бірақ шахтерлармен сөйлескендіктерін я болмаса олардың талап тілектері туралы еш мәлімет таратпады.
«АрселорМиттал Теміртау» АҚ көмір департаментіндегі жағдай туралы 2017-ші жылдың 11-ші желтоқсанында «АрселорМиттал Теміртау» АҚ Көмір департаментінің төрт шахтасының жұмыскерлер тобы ауысым аяқталған соң жұмыс орындарынан кетуден бас тарты. Компания басшылығы мен жұмыскерлердің мүддесін ортаға салатын «Қорғау» көмір кеншілері кәсіподағының арасында еңбек заңнамасы шеңберінде келіссөз басталды. Басқа шахталар штаттық режимде жұмыстарын жалғастырып жатыр. Жағдай Қарағанды облысы әкімдігінің бақылауында», - деп Қарағанды облысы әкімдігі баспасөз мәлімдеме таратты.
Естеріңізде болса, қараша айының 30 күні, дәл мереке алдында, Жезқазған қаласында «Қазақмыс» компаниясының жұмысшылары да шахтадан шықпай қойып, қарсылық акциясын өткізген еді. Енді міне Тәуелсіздік күні қарсаңында тағы бір алпауыт компанияның жұмысшылары еңбекақыларының аздығына наразылық танытып отыр.
P.S. Соңғы түскен мәліметтер бойынша, "Тентек" шахтасында келіссөздер басталып кетті.
