Бұрынғы депутат Мұхтар Тінікеев ереуілдегі шахтерлерге қолдау көрсетті
Кешелі бері Қарағандыда еңбекақыларын көтеруді талап етіп, жер астынан шықпай отырған кеншілер мәселесі әлеуметтік желілерде қызу талқылануда. Қолданушылардың көбісі шахтерлар талабын орынды деп отыр.
Солардың бірі шахтерлар отбасында өскен, экс-депутат Мұхтар ТІНІКЕЕВ.
«Мен кеншілердің көтеріп отырған талабын әділ деп санаймын. Ресейдің Кривой Рог қаласындағы өндірісінің жұмыскерлері осындай талап қойғанда «Арселор Миталл» компаниясы біздің де шахталарға да назар аудару керек еді. Инвестор тек оларға ғана көтерді жалақысын! Сонда ол ереуілге шыққандарға ғана көтере ме? Екінші қоңырау , «Қазақмыс» компаниясының кеншілерінен де талап қойылды. Сонда "Арселор Миталл" «прокатит» деп ойлады ма?», -
деп жазды ол.
Қарағанды облыстық әкімдік баспасөз қызметінің мәліметінше, кеше кешке кеншілердің туыстары компания басшыларымен кездескен. «11 желтоқсан күні 19:30- 21:30 уақыт аралығында Шахтинскідегі кеншілердің отбасы мүшелері облыс әкімінің орынбасары және «АрселорМиталл Теміртау» АҚ өкілдерімен кездескен болатын. Кеншілердің туған – туыстарына қалыптасқан жағдай туралы, сонымен қатар, қойылған барлық сұрақтарға түсініктеме берілді», делінген таратылған хабарламада.
Естеріңізге сала кетейік, кеше, 11 желтоқсан күні таңертең түнгі ауысымнан кейін «Тентек», «Шахтинск», «Қазақстан» мен «Ленин» шахталарының кеншілері жер астынан шықпай қойған. Олардың негізгі талаптары: жалақыны 100 пайызға көбейтіп, еңбек жағдайын жақсартып және зейнетке 50 жаста шығару.
Алайда, компания басшылығы мен жұмыскерлердің мүддесін ортаға салатын «Қорғау» көмір кеншілері кәсіподағының арасындағы өткен келіссөзде еңбекақы кезеңмен 20- 30 пайызға ғана көтеріледі деп айтылды.
Дегенмен, кеншілер жалақылары 100 пайызға көбеймегенше, наразылық акциясын жалғастыра бермек.
