Олар «Қорғаудан» бас тартып мүдделерін қорғауды басқа ұйымға тапсырды
«АрселорМиттал Темиртау» компаниясының сегіз шахта кеншілері ереуілге шыққалы үш тәуліктен асты.
Кеше түнде облыс әкімімен кездесуден кейін кейбір шахтерлар жоғарыға көтерілген. Қарағанды облыс әкімінің баспасөз қызметі хабарлағандай, шахтерлер кеше күндізден бері күткен облыс басшысы Ерлан ҚОШАНОВ түн жарымда шахтаға түскен. Ал «Арселор Миталл СНГ » бас директоры Парамжит КАЛОН кеншілермен кездесуге дәті бармағанға ұқсайды.
«12-ші желтоқсан 14.00-де Қарағандыға «АрселорМиттал СНГ» бас директоры Парамжит Калон Қарағанды облысының әкімі Ерлан Қошановпен кездесуге келді. Шахтадағы жағдайды талқылау 23.00-де аяқталды. Содан кейін аймақ басшысы «АрселорМиттал Теміртау» АҚ атқарушы директоры Вадим БАСИНМЕН бірге шахтерлерге аттанды. Олар сағат 00:30 шахтаға түскен», делінген хабарламада.
Ерлан Қошанов төрт бірдей шахтаға түсіп, кеншілермен келіссөз жүргізген. Нәтижесінде, жер бетіне 154 кенші көтерілді. Ал, қалған 494 шахтер талаптары толық орындалмайынша, жер астынан шығудан бас тартты. Екі тәуліктен аса отырған шахтерлерге әйелдері мен еріктілер азық-түлік жіберуді доғармаған.
Сонымен қатар, «Қазақстан» шахтасындағы кеншілер «Қорғау» кәсіподағына сенімсіздік білдіріп, өз мүдделерін қорғауды «Шахтёрская семья» қоғамдық ұйымының өкілінің бірі Наталья ТОМИЛОВАҒА тапсырған.
Наталья Томилованың айтуынша, облыс әкімі шахтерлар еңбекақыларың тек 30 пайызға көтереміз дегенін жеткізді.
«Бұған шахтерлар келісіп жатқан жоқ. Қалған қойылған талаптар бойынша әлі келіссөздер болады. Бүгін кеншілер өкілдерін жинаймыз деген. Ал, нақты қай жерде, қашан айтылған жоқ. Күтіп отырмыз», - деді ол.
Сондай-ақ, әлеуметтік желілерде кеше кешкілік Шахтинскіде қамауға алу жағдайлары орын алғаны туралы мәлімет тараған. Бұл ақпаратты Қарағанды облысының Ішкі істер департаментінің баспасөз қызметі жоққа шығарды.
