Ақтөбелік ата-аналар облыс әкімі Бердібек Сапарбаевқа шағымданып барды
Ақтөбелік кейбір мектептер үшін үшінші тоқсан дау-дамаймен басталды. 8-қаңтардан бастап қала мұғалімдері хиджаб киген оқушыларды сабаққа кіргізбей қойған. Бұған наразылық білдірген бір топ ата-ана облыс әкімі Бердібек САПАРБАЕВҚА шағымданып барыпты. Алайда, өңір басшысы Білім және ғылым министрлігінің бұйрығын орындау керек деп қысқа қайырған.
Бұған дейін мектеп директорлары мен сынып жетекшілері ата-аналарға министрліктің бұйрығын жеткізіп, түсіндіру жұмыстарын жүргізген. Ведомствоның шешіміне сәйкес білім ордаларында кез-келген діни атрибуттарға тыйым салынады. Сондықтан да білім басқармасының тапсырмасымен орамал оранған оқушылар үшін мектептердің есігі жабылған.
Бұндай шешімге келіспеген 15 ата-ана Бердібек Сапарбаевтың тікелей өзімен сөйлеспек болған еді. Әйтседе, полиция оларды әкімге жібермей қойды. Көпшіліктің алдына облыстық білім басқармасының басшысы Ләззат ОРАЗБАЕВА шықты.
Қысқасы, шағымданушы жақ мектеп тарапынан заңсыздыққа жол беріліп отыр деп есептейді. Егер мемлекет балаларымызды мектепке жібергісі келмесе шариғат жолын ұстанған балаларға арнайы оқу мекемесін ашып берсін дейді.
- Ата-аналық міндеттеріңді орындамасаңдар балаларыңды сабаққа жібермейміз, айыппұл саламыз деп қорқытып жатыр. Біз қыздарымыздың оқығанын қалап мектепке жіберіп отырмыз ғой. Яғни өз міндетіміздің атқарып отырмыз. Біз ешкімге де орамал тағыңдар деп үгіт-насихат жүргізбейміз. Өз қалауымыз бойынша балаларымызға тәрбие беруге тыйым салып отыр ғой, - деді тағы бір наразы ана.
Әкімдікке келгендердің пікірін Ләззат Оразбаева тыңдап шықты. Алайда білім басқармасы басшысымен жарты сағат әңгіме құрған әйелдер әркім өз пікірінде қалды деп тарасты.
- Министрліктің бұйрығы бар. Оның шыққанына екі жыл болды. Бұл жерде діннің қатысы жоқ. Бекітілген мектептің формасы бар. Мәселе осында ғана. Діни себептермен мектептерде балалардың құқығы тапталмайды. Ол заңсыздық. Барлық оқушылар мен олардың ата-аналары министрліктің ережелеріне бағынулары тиіс. Мектеп басшылары мен мұғалімдер сол министрліктен түскен бұйрықтың орындалуын талап етеді. Көшеде, үйде, біз ол оқушыларға орамал тақпаңдар деп тыйым салмаймыз ғой. Мәселе мектептегі тәртіпте, - деді Ақтөбе облыстық білім басқармасының басшысы.
Мектептегі хиджаб мәселесі Ақтөбе облысында ғана емес. Бұл проблема Маңғыстау облысындағы Жаңаөзен қаласында да болған еді.
