Кеншілермен кездесуге не облыс әкімі, не «АрселорМитталТеміртау» басшысы келмеген
Наразылық акциясын өткізіп жатқан «АрселорМитталТеміртау» шахтерлар өкілдері сейсенбі күні, 12 желтоқсанда таңертеңнен бастап Қарағанды облыс әкімі Ерлан ҚОШАНОВ пен компанияның бас директоры Парамжит КАЛОНАНЫ күтті.
Олар «Тентек» шахтасына күндізгі сағат 3-те келеді деген ақпарат тараған болатын. Алайда ешқайсысы да төбесін көрсетпеді. Шенділерді күтіп шаршаған халық кешке тараған.
Кейін, сағат кешкі 8 шамасында өзара ақпарат алмасып отырған месенжерде шахтерлардың бірі: «ақыры ешкім келмеді, бірақ, компаниядан бейтаныс біреу келіп, жалақы тек 30 пайызға көтеріледі деп айтты», деген ақпарат таратты. Оның өзі жер астындағы жұмысшыларға ғана қатысты, ал басқасына, тек 10 пайыз қосылуы мүмкін.
Өзін таныстырмаған компания өкілінің: «Қанша отырсаңдар да, түк шықпайды бұдан. Отыра беріңдер, осылай! Бәрібір осыдан артық бермейміз!», деген сөзін жеткізді кенші.
Ал, шахтерлардың әйелдері мен еріктілер күні бойы азық-түлік жеткізумен болды. Сегіз бірдей шахта жұмысшылары еңбекақыны 100 пайызға өсіру туралы талап қойған болатын. Бүгін «Тентек» шахтасына келген еріктілер жер астындағы кеншілерге жылу жиналып жатқанын мәлімдеді.
«Кеншілердің әйелдері ыстық тамақ, кейбіреулері күйеулеріне хат та жазып жіберген. Біз соны әкелдік. Басқа еріктілер де тартылып жатыр. Ақшалай жинап, нан, шұжық, суларын сатып алдық», - деді ерікті Елена ТУЛУПОВА.
Айлық табыстары орташа есеппен алғанда 120 мыңды құрайтын кеншілердің жағдайы Еңбек және әлеуметтік қорғау министрі Тамара ДҮЙСЕНОВАҒА да жеткен. Министр өз кезегінде жер астындағы шахтерлерге компания тарапынан барлық жағдай жасалып жатқанын мәлімдеген. Атап айтқанда, жедел жәрдем көмегі мен азық-түлік тұрақты беріліп жатыр деген еді.
«Қарағанды облысының әкімдігі берген мәліметтерге сәйкес, олар 684 адам. Ең бастысы, медициналық көмек пен тамақтану бойынша барлық қажетті шаралар қолға алынған», - деген еді Тамара Дүйсенова.
Алайда, еріктілер керісінше, екі күннен бері ыстық тамақтың берілмегенін алға тартып отыр.
«Міне, біз үш шахтада болып келдік. Соңғысы осы Тентек шахтасы. Кешеден бері жер астындағы шахтерлар ыстық тамақ ішпеген. Еріксіз біз бүгін өзіміз кірістік», - дейді олар.
Қазіргі таңда «АрселорМиттал Темиртау» компаниясының барлық сегіз шахтасында кеншілер ереуілді жалғастыруда.
