Қарағандыда кеншілер жағына шыққан әріптестеріне қысым жасала бастады
«АрселорМитталТеміртау» кеншілерінің құқығын қорғайтын «Жақтау» металлургтер кәсіподағының белсенділері Қарағанды облысы әкімі Ерлан ҚОШАНОВ пен компания бас директоры Парамжита КАЛОНАҒА үндеу жолдады.
Кәсіподақ өкілдері өз үндеулерінде көмір шахтасындағы шахтерларға қолдау білдірген.
«Ереуілшілердің айлықты 100 пайызға көбейту, зейнетке 50 жаста шығу туралы талаптары дұрыс. Металлургтер өз құқықтарын қорғап жатқан шахтерларды қолдайды», дейді олар.
Кәсіподақ басшыларының сөзінше, металлургтер мен шахтерлар бір компанияда еңбек етеді. Сондықтан келіссөздер біздің қатысуымызбен өтуі тиіс. Яғни келіссөз жүргізетін комиссия құрамында болат департаментінде еңбек ететін жұмысшылар да болу керек деген талаптарын қойып отыр.
«Егер бір жақты (көмір департаментінің қатысуымен) ғана қаралса, болат департаменті жұмыскерлері де түрлі наразылық акциясын бастайды», - делінген «Жақтау» ұйымы төрағасының орынбасары Владимир ДУБИННЫҢ қолы қойылған құжатта.
Металлургтер шахтерларға қолдау көрсетіп жатқанда, бөлім басшылары комбинат цехындағы жұмысшыларды басқа үндеуге қол қоюға күштеп жатыр деген ақпарат тарады.
Ол үндеуде металлургтер шахтерлардан ереуілді тоқтатуды сұрап, жұмыс жасауға шақырып жатыр-мыс. «Компания сендерге жалақыны 100 пайызға өсіре алады, бірақ жұмыс дұрыс жүрмесе, пайда болмаса компанияны мүлдем жауып тастауы мүмкін», - деп келтірілген үндеуде.Сондай-ақ, үндеуде өндіріс төмендеп кеткені, жұмыс планы өзгергені де жазылған.
Кейбір ақпараттар бойынша бұл үндеуге қол қоймаған металлургиялық комбинат жұмысшыларының аты-жөндері тізімделіп жатыр.Осылайша, бір компанияның жұмысшылары екіге бөлініп жатыр.
