Әйеліне сыйлық жасағысы келген Қылмыстық-атқару жүйесінің офицері сотталды
Әйеліне сыйлық жасағысы келген ақмолалық майор шенінен айырылып, өмір бойға қызметінен босатылды. Қылмыстық-атқару жүйесі саласында бірнеше жыл қызмет етіп, майор шеніне дейін жоғарылаған үлгілі қызметкер, 4 баланың әкесі тырнақтап жиған абыройынан бір-ақ күнде айырылып қалды.
Ақмола облысы, Атбасар ауданы Қылмыстық-атқару жүйесі департаменті пробация бөлімінің бастығы, юстиция майоры Ербол ЖАКИН мерзімінен бұрын босап шығып, 1 жыл 11 айға бостандығына шектеу қойылған С.А. ЯЦЕНКО есімді азаматты 22-00 ге дейін жұмыста болуына рұқсат беріп, есесіне сотталуышының ағаш кеме жасап беруін талап еткен.
Заңға сәйкес Яценко жұмыс уақыты аяқталғаннан кейін жұмыс орнында болмауы тиіс. Өзі ауызша рұқсат бере тұра, Жакин Яценконың кешкі уақытта жұмыста жүргеніне байланысты бөлім инспекторы С.Б.ЫСҚАҚОВ (Ол Яценкоға тікелей жауапты болған) ескерту айтады. Осындай жолмен майор өзінің заңсыз әрекетін жасырғысы келген. Ал, ескерту алған инспектор мән-жайды анықтау үшін Яценкоға хабарласқанда оның жұмыста түнге дейін жүруіне Жакиннің рұқсат бергенін естиді.
Бөлім басшысының әрекетінің заңсыз екенін түсінген Яценко 2017 жылдың шілде айының 31-күні Ақмола облысы бойынша сыбайлас жемқорлыққа қарсы іс-қимыл Департаментіне шағымданады. Жакин сұраған кемені көрсетілген мерзімде жасап бітіре алмайтынын білген Яценко дайын кемені 60 мың теңгеге сатып алып,келісілген күні Жакинға табыстайды. Сол жерде юстиция майоры ұсталады.
Жакин сол жерде де, сот залында да кінәсін мойындаған жоқ. Айтуынша, ол кемені пара ретінде алмаған. Әйеліне сыйлық жасау үшін тапсырыс беріп, Яценкодан сатып алмақшы болған. «Яценконың жарнамасын әлеуметтік желіден көрдім» деген Жакин тапсырысы үшін 3000 теңге төлегенін алға тартты. Ал, Яценко болса, ешқандай ақша көрмегенін, тіпті, Жакиннің ақша төлейтіні туралы жақ ашпағанын айтады.
2017 жылдың 4-ші желтоқсанында Ақмола облысы, Атбасар аудандық сотына Ербол Жакинның ісі түседі. Пара ретінде сувенир ағаш кеме алды деген айыппен ҚР ҚК-нің 366 бабының 2-тармағы бойынша жауапқа тартылады. Сот барысында сараптама қортындысы бойынша ағаш кеме 29 800 мың теңгеге бағаланған. Алайда, бұл юстиция майорын жазадан құтқармаған. 2018 жылдың 19-шы қаңтарында судья ШАРАПАТОВ А.А үкім шығарды.
Осылайша, әйелінің туған күніне сыйлық жасамақшы болған Жакин Ерлан Төлеубайұлы «Юстиция майоры» атағынан айырылып, өмір бойға мемлекеттік қызметте, жергілікті өзін-өзі басқару органдарында, Қазақстан Республикасының Ұлттық Банкінде және оның ведомстваларында, ұлттық холдингтарда, компанияларда, институттарда жұмыс істеуіне шеутеу қойылды.
Сондай-ақ, ол 1 490 000 теңге көлемінде айыппұл төлейтін болады.
Фото: yandex.ru.
