Көкшетауда америкалық блокбастер желісі бойынша сауда орталығы тоналды
Көкшетауда «Строймарт» сауда орталығын сонда жұмыс жасайтын әкімгер тонаған. 25 жастағы ойынқұмар күдікті ұтыс тігу үшін дүкеннің сейфінен 2 млн-ға жуық қаражатты ұрлап алған. Алайда, құмар ойынан пайдаға қарық боламын деген жігіт ұтылып қалған.
Сауда орталығын тонау операциясы шетелдік кинолардың сценарийіндей өрбіген. Қаңтарды 15 күні сағат кешкі 18-30 шамасында беттеріне маска киген екі жігіт дүкенге бас көктеп кіріп, әкімгерге күш көрсетеді. Сосын сейфтегі қомақты қаражатты алып тайып тұрған. 25 жастағы әкімгер көп ойланбастан полицияға хабар береді. Тонау операциясының ұйымдастырушысы полиция күдігіне ілінбес үшін сыбайластарына өзін жаралауға да рұқсат берген. Алдын ала келісілген жоспар бойынша олар әкімгерге бірнеше рет пышақ сұғып алған. Алайда, қанша тырысқанымен айлалары жүзеге аспаған.
- Жедел іздестіру шараларының нәтижесінде полицейлер шынайы шабуылдың болмағанын анықтады. Ал, қылмысты әкімгердің өзі алдын ала жоспар бойынша, таныстарымен келісіп, ұйымдастырған. Тәртіп сақшылары алғашқыда «Шабуыл» бабы бойынша тергеу амалдарын бастаған. Енді, оны «жалған шағым» және «тапсырылған өзгенің мүлкін иелену немесе ысырап ету» баптарына ауыстыру сұрағы қарастырылып жатыр. Яғни, күдікті екі бап бойынша жауапқа тартылатын болады, - дейді Ақмола облыстық ІІД баспасөз қызметінің жетекшісі Гүлнәр ПИНЧУК.
- Бірінші "Арсеналға" 1 млн қойып, ұтылып қалдым.Одан кейін ПСЖ мен "Барсаға" 700 мың теңге қойып, 1 млн 200 мың ұттым. Сосын 1 млн 500 мың тенниске қойдым. Тағы да ұтылып, ақшамнан айырылып қалдым,- дейді тергеу абақтысында жасаған ісіне өкініп отырған күдікті.
Құрылыс заттары сатылатын сауда орталығында күдікті небәрі бір жылдай ғана жұмыс істеген. Енді бірнеше жылға сотталуы мүмкін. Екі сыбайласының кім екендері анықталып, оларды іздестіру жұмыстары басталып кетті.
Фото: Тengrіnews.kz.
