Қостанай "Баян сұлу" кондитерлік фабрикасы бүкіл халыққа ұнайтын образ таппақшы
Қазақстан телеарнасындағы "Баян Сұлу" сериалынан туындаған даудан кейін Қостанай "Баян сұлу" кондитерлік фабрикасы бүкіл xалыққа ұнайтын Баян таппақшы. Фабрика өкілдері «BAYAN SULU-2018» Халықтық бейне - Халық таңдауы» атты бүкілреспубликалық байқау жариялады.
Сайысқа 18-35 жас аралығындағы қыз-келіншектер қатыса алады, олар www.halykbayansulu.kz сайтында арнайы анкета толтырып, өз фотосы және видео-ақпаратты жүктеуі керек. Байқау жеңімпазы 2018 жылдың 15 сәуірі, Ұлттық Ғашықтар күнінде белгілі болады.
Естеріңізге салсақ, Ұлттық арнада көрсетілген «Қозы Көрпеш – Баян Сұлу» телехикаясынан кейін туынды көрермендер көкейінде ұнамсыз ой қалыптастырып, резонанстың орын алуына ұйытқы болғаны жасырын емес. Сыни пікірлер әсіресе, басты кейіпкер Баян Сұлудың образына бағытталды, яғни «...көрермен қауым өз қалауындағы шынайы, жырдағы бейнемен ұштасатын қазақ аруын көре алмады». Ұйымдастырушылардың айтуынша, бұл жағдай - қазақ халқының осы тұста өз ойын білдіргісі келгендігінің айқын мысалы және халықтың сүйікті кейіпкерін таңдауға қатысуға ниетті екенін анық аңғартады.
«Біз қызу талқыға түсіп отырмыз. Қоғамымызда шынайы Баян Сұлу бейнесін дәріптейтін түсінікті толық қалыптастыруға үлес қоссақ дейміз. Сондықтан да қазақстандықтарға қаракөз аруларымыздың арасынан ұлтымыздың сүйікті образына ақылы мен көркі сай келетін, онымен ұштасатын бейнені анықтау мүмкіндігін ұсынуды жөн санадық», - деді «Баян Сұлу» кондитерлік фабрикасының өкілі және ұйымдастыру комитетінің төрағасы Марлен АБЫЛҒАЗИНОВ арнайы баспасөз маслихатында.
Осыған орай Ғ.МҮСРЕПОВ атындағы жасөспірім театрында Баянды сомдайтын актриса Динара АБДУЛИНА байқауға қатысушылар өздерінің ерекшеліктірімен қатар халық эпосы туралы және оның тарихы жайлы білімін аңғартса екен деген тілек білдірді.
Біз өзіміздің төл мереке - «Қозы Көрпеш – Баян Сұлу» Ғашықтар күнінің кең насихатталып, тойлануын қолдаймыз. Сондықтан да, бұл дауыс берудің өтуі орынды-ақ, және әр отандасымыз бей-жай қалмай, дауыс беру арқылы өз ойын білдіре алады, яғни бұл дегеніміз – өткен дәстүріміз бен ұлттық негізімізді ұлықтау»,- деді өз кезегінде «Айқын» газетінің бас редакторы және байқаудың әділ қазылар төрағасы Нұртөре ЖҮСІП.
Халықтың дауыс беру нәтижесінің негізінде финалдық кезеңге 5 қатысушы өткізіледі. Мерекелік ақтық бәсеке 15 сәуір күні Алматы қаласында өтеді. Әділқазылар алқасының шешімімен бес қатысушының арасынан бір жеңімпаз анықталады. Жеңімпаз ару автокөлікке ие болып, жыл бойына «Баян Сұлу» кондитерлік маркасының ресми бейнесі болып танылады.
Фото автордікі.
