Динара Жаркеева. «Бірыңғай жинақтаушы зейнетақы қоры» АҚ (БЖЗҚ) экс-басшысы Руслан Ерденаев пен оның орынбасары Дабыр Медетбековқа 700 мың доллар көлемінде пара алды деген айып тағылуда, деп хабарлады агенттіктің тілшісі сот залынан.
«Ол (Р. Ерденаев - ҚазТАГ) мемлекеттік функцияларды жүзеге асырушы тұлға бола тұра «БЖЗҚ» АҚ басқарма төрағасының орынбасары Д. Медетбековпен алдын ала келісе отырып, бірқатар адамдармен бірлесіп делдал Т.Тортаев арқылы «Бузгул Аурум» ЖШС жалғыз құрылтайшысы Б.Кенжебаевтан аса үлкен көлемде 700 мың долларды БЗЖҚ-ның «Бузгул Аурум» ЖШС облигацияларын сатып алуы үшін алған. Осылайша ҚР ҚК 366 бабы 4 бөлімі бойынша қарастырылған қылмысты жасаған», - деп оқыды айыптау актісін прокурор сәрсенбіде.
Осы ретте, аталып өткендей, Р.Ерденаев пен Д.Медетбеков көрсетілген соманы өзара сәйкесінше 400 мың доллар және 300 мың доллар көлемінде бөлісуге келіскен.
Сонымен қатар, айыптау нұсқасы бойынша, Р.Ерданаев бірқатар тұлғалармен бірлесіп, атап айтқанда Д. Медетбеков, Б. Кенжебаев, А. Найзағарин және Бахтовтың көмегімен өзіне сеніп тапсырылған мүлікті ысырап еткен, яғни аса үлкен көлемде жымқырған, осылайша ҚР ҚК 189 бабы 4 бөлімінің 2 тармақшасында қарастырылған қылмысты жасаған.
Айыптау актісіне сәйкес, «БЖЗҚ» АҚ басқарма төрағасының экс-орынбасары Д. Медетбековке ҚР ҚК 366 бабы 4 бөлімі, 189 баптың 4 бөлімі бойынша айып тағылған. Ал, «БЖЗҚ» АҚ тәуекелді басқару департаментінің қаржы тәуекелдері басқармасының бастығы М. Бахтовқа ҚР ҚК 28 бабы 5б, 189 баптың 4 бөлімі 2 тармақшасы бойынша, сонымен қатар «Бузгул Аурум»ЖШС қадағалау кеңесінің төрағасы Б. Кенжебаевқа ҚР ҚК 189 баптың 4 бөлімі 2 тармақшасы бойынша, «Бузгул Аурум»ЖШС директоры А. Найзағаринге ҚР ҚК 189 баптың 4 бөлімі 2 тармақшасы, 28 баптың 5 бөлімі, 367 баптың 4 бөлімі бойынша, «Мегатрансазия» ЖШС директорының бұрынғы орынбасары Т. Тортаевқа ҚР ҚК 368 бабы 1 бөлімі бойынша айып тағылуда.
Атап өтер болсақ, Р. Ерденаев, Д. Медетбеков пен Б. Кенжебаев тағылған айыпқа қатысты өз пікірлерін білдіруден бас тартты. Ал, М. Бахтов тағылған айыппен келіспей, кінәсін мойындамады. А. Найзағарин болса өз кәнісін жартылай мойындаса, Т. Тортаев өз кінәсін толығымен мойындап, кешірім сұрады.
Бұған дейін хабарланғандай, айыптаушылар қатарында «БЖЗҚ» АҚ экс-басшысы Руслан Ерденаев, «БЗЖҚ» АҚ басқарма төрағасының экс-орынбасары Д. Медетбеков, «БЖЗҚ» АҚ тәуекелді басқару департаментінің қаржы тәуекелдері басқармасының бастығы М. Бахтов, «Бузгул Аурум» ЖШС қадағалау кеңесінің төрағасы Б. Кенжебаев, «Бузгул Аурум» ЖШС директоры А. Найзағарин, «Мегатрансазия»ЖШС директорының бұрынғы орынбасары Т. Тортаев бар.
Естеріңізге сала кетейік, БЖЗҚ-ның экс-басшысы Р.Ерденаев, М. Бахтов, Б. Кенжебаев, сонымен қатар А. Найзағарин ағымдағы жылдың қаңтар айында тұтқындалды. Оларға ҚР ҚК 189 бабы 4 бөлімі 2 тармақшасы бойынша (сеніп тапсырылған жеке мүлікті иелену және ысырап ету) айып тағылған.
Өткен жылдың желтоқсан айында ҚР Ұлттық банкінің өтініші бойынша құқық қорғау органдары «БЖЗҚ» АҚ қызметін «Бузгул Аурум» ЖШС облигацияларын қордың жеке қаржысына 5 млрд теңгеге сатып алу фактісі бойынша тексерістен өткізді.