Өскемендегі Халифа Алтай мешіті андроидты құрылғыларға арналған онлайн уағыз қосымшасын жасап шығармақ. Бұл туралы ғибадат үйінде өткен ашық есік сағатында айтылды, деп хабарлайды ҚазАқпарат. Өңірдегі 14 діни конфессияның басшылары облыстық мешіт ұйымдастырған ашық есік сағатында бас қосты. ҚМДБ-ның Өскемен өңірі бойынша өкіл имамы Ермек қажы Мұқатай дін өкілдерімен ашық сұхбат өткізіп, мешіттің тыныс-тіршілігімен, халыққа көрсетілетін қызмет түрлерімен таныстырды. Өз кезегінде конфессия өкілдері исламда кең таралған ұғымдар туралы сауал қойып, білім көкжиегін кеңейтуге тырысып жатты. Бұл шара осы мешіт базасында ұйымдастырылған мұсылман қыз-келіншектердің республикалық семинарына дөп келіпті. Аталмыш семинарға ҚМДБ атынан қатысушы наиб мүфти Нұржан Есмахан да конфессия өкілдерімен кездесіп, ел бірлігін бекемдеу жолындағы жұмыстарына табыс тіледі. «Біздің ел үш жылда бір рет Әлемдік және дәстүрлі діндер лидерлерінің съезін өткізіп келеді. Оған Елбасымыздың өзі төрағалық ететінін де жақсы білесіздер. Өскемендегі ашық есік сағаты сол басқосулардың жаңғырығы іспеттес. Ел ішіндегі ынтымақты нығайтудағы ортақ істеріңіз берекелі болсын», - деді Бауыржан Есмахан. Конфесиия өкілдері облыстық мешіттің өз жұмысына ақпараттық технологияларды батыл енгізіп жатқанын ерекшелік ретінде атады. «Имамның айтуынша мұндағы діни қызметкерлер электронды тестілеу арқылы сынақтан өтіп тұрады екен. Дәріс залдары бірнеше тілдегі діни әдебиетпен, компьютер сыныптарымен жабдықталыпты. Заман ағымынан қалмай, оны өз жұмыстарына икемдеп алғандары ұнады», - дейді Өскемен және Семей епископы Андрей Бондаренко. Өңірдің өкіл имамы Ермек Мұқатай алдағы екі айдың ішінде намаз уақытындағы уағыздарды онлайн режимде трансляциялайтын андроидтық қосымша дайын болатынын жеткізді. «Бұған дейін біздің практикамызда Skype жүйесі арқылы онлайн уағыздар жүргізу болған. Бірақ оның ауқымы да аудиториясы да тар еді. Ал андроидтық қосымша кез келген ұялы телефон иесіне қолжетімді. Бағдарлама 90 пайызға дайын. Екі айдың ішінде іске қосылады деп отырмыз. Оның қаржылық шығынын демеушілеріміз көтеріп отыр, - дейді өкіл имам.
Имамның айтуынша бұл қосымшаға бес уақыт намаз кезінде айтылатын уағыздардан бөлек электронды кітаптар да енгізілмек. Діни әдебиеттермен қоса Абай, Шәкәрім сияқты тұлғалардың еңбектері, салт-дәстүр сипаттары да қосымшаның мазмұнын байытуы тиіс. Ашық есікке жиналған конфессия басшылары мұндай шараны тұрақты өткізіп тұруға уағдаласып тарады. Дәстүрге айналатын басқосуды әр жолы әр түрлі конфессия ұйымдастыратын болады.
