Сирияда қазақстандық 400-дей бала жүр, деп хабарлады «Вечерняя Астана»-ға сілтеме жасаған ҚазТАГ.
«Біз күйеулерінің діни көзқарастарына байланысты жиі зорлық-зомбылыққа ұшырайтын әйелдермен тығыз жұмыс жасаймыз. Оның үстіне бүгінгі таңда біздің 390-дай баламыз Сирияда жүр, қазіргі таңда оларды елге қайтару жұмыстары жүргізілуде, олармен де жұмыс жасауымызға тура келеді», - деп келтірілген дүйсенбіде жарияланған хабарда дін істері басқармасының басшысы Данияр ЕСИННІҢ сөзі.
Оның айтуынша, жыл басынан бері дін істері жөніндегі елордалық басқарма салафиттік идеологияны белсенді насихаттайтын әлеуметтік желілердің 1090 қолданушысын анықтаған. Талдау көрсеткендей, әр түрлі әлеуметтік желілердегі 589 ақпарат көзі деструктивті діни идеологияны насихаттайды. Қазақстан аумағында тыйым салынған және деструктивті идеологияны насихаттайтын 1277 мақала, соның ішінде террористік актілер жасауды да насихаттайтын материалдар бар.
«Біз өз тарапымыздан да желідегі заңсыз миссионерлік қызметі үшін жауапқа тартамыз», - деді Д. Есин.
Сонымен қатар, басқарма басшысы атап өткендей, ұлтаралық алауыздықты тұтатқаны үшін 3 адам жазаланған. Енді олармен құқыққорғау органдары айналысып жатыр.
Дін істері басқармасы конфессияаралық алауыздықты тұтату, деструктивті діни ағымды насихаттау, экстремизм мен терроризмді насихаттау туралы әлемнің түрлі өңірлеріндегі 2,5 мыңнан астам интернет-көздер қамтыған. Мамандар сайттарды ағылшын, орыс, қазақ, парсы, түрік және араб тілдерінде талдайды.
Астанада тұрақты діни жағдайды қолдауға құрамына дінтанушылар, теологтар, психологтар, меморган өкілдері, полиция - барлығы 100 адам кіретін ақпараттық-түсіндіру тобының жұмысы да ықпал етеді. Өткен жылы олар аудиториясы 31 мың адам болатын халықпен 438 кездесу өткізді. Жалпы 3 жылға басқарма 626,5 млн теңге бөледі, оның 198 млн теңгесі 2018 жылға арналған. Бұл ретте елордадағы діни жағдай туралы қоғамдық пікірді қалыптастыру, болжау, зерттеу туралы жұмысқа 291 млн теңге керек. Одан басқа радикалды діни ағымды ұстанушылар мен олардың ықпалына ұшырағандарды оңалту 17 млн теңгеге бағаланып отыр.