Астанада табиғи сипаттағы төтенше жағдай жарияланды, деп хабарлады елорда әкімінің баспасөз қызметінен.
«Табиғи жағдайдың күрт өзгеруіне байланысты, Астана қаласының әкімі Әсет Исекешевтің шешімімен табиғи сипаттағы төтенше жағдай жарияланды», - делінген бейсенбіде таратылған хабарда.
Бұл ретте, өрт сөндіру қызметі, жедел медициналық жәрдем, Астана қаласының ІІД, ТЖД, коммуналдық қызметтер сияқты қала тіршілігін қамтамасыз ету мекемелерінен өзге мемлекеттік органдар, білім беру мекемелері, кәсіпкерлік (базарлар, СОСО) және құрылыс нысандарының басшыларына қызметті уақытша тоқтату ұсынылды.
Естеріңізге сала кетейік, 11 қаңтарда Астана қаласында мектеп оқушылары мен 1-2 курс студенттері үшін бірінші ауысымда колледждерде сабақ тоқтатылды. Елордада метеорологиялық жағдайдың нашарлауына байланысты Nursultan Nazarbayev әуежайы уақытша жабылды. 13 қалалық маршрутта автобус қозғалысы тоқтатылды.
«Қазіргі уақытта Астананың көлік қозғалысы барлық бағыттар бойынша толығымен жабылды. Ақмола, Қарағанды, Павлодар, Қызылорда облыстарындағы қозғалыстар да жабылды. Барлық жолдарда патрульдік жол полициясы, жол қызметтері орнатылып, төтенше жағдайлар жөніндегі комитеттің құтқарушылар міндеті ұйымдастырылды», - деді Қ.Қасымов бейсенбіде.
Сондай-ақ, Астана әкімдігінде елордадағы боранға байланысты өте сақ болуды ескертті.
Елорда билігі қала қонақтары мен тұрғындарынан көшеге қажет болған жағдайда ғана шығуды ұсынды.
«Қазіргі таңда қаланың барлық коммуналдық қызметі күшейтілген режимде жұмыс жасап жатыр», - деді елорда билігі.