Мирзиеевтің бұл әрекеті көршілес президенттерге ой сала ма?
Ақтөбедегі автобустың өртенуінен 52 өзбек азаматының қайтыс болуына байланысты, Өзбекстан президенті Шавкат МИРЗИЕЕВ мәлімдеме жасады деп хабарлайды РИА Новости басылымы. Өткен жұмада Сұрхандария облысындағы жұмыс сапарында Мирзиеев Хакім Термезидің кесенесіне барып, қаза болған 52 азаматтың әруағына арнайы Құран бағыштады.
«Бұл қайғылы оқиға біраз жұмыстарды реттеу керегін көрсетті. Адамдар өз елімізден жұмыс таппаған соң, басқа елден жұмыс іздеуге мәжбүр болды», - дей келе, Мирзиеев бұл қайғылы жағдай президенттің және жұмыссыздық мәселесін шешуге тиіс сала қызметкерлерінің жұмыспен қамту проблемасын шешпегенін дәлелдейтінін ашық айтты. Сонымен қатар, ол «Халықтың алдында қарызымыз өте көп» деп қадап айтып,айналасындағы шенді-шекпенділерге халықпен жұмысты бірлесе атқаруды тағы ескертті. Осылайша Өзбекстан президенті биліктің ұшар басынан кеткен үлкен қателікті мойындады. «Өз кінәсін мойындау – үлкен ерлік» екенін ескерсек, бұл ретте Мирзиеевке адами тұрғыдан алғыс білдіру артық болмас.
Ал енді осы мәселеге қазақстандық көзқараспен қарап көрейікші. Бізде 52 емес, жүздеген, тіпті мыңдаған адамның жұмыссыздықтан, шарасыздықтан өмірлері қиылды. Жұмыссыздықтың салдарынан ұрлық, қылмыс күн санап көбеюде. Кез келген ақпарат құралын ашып қарасаңыз, бұл сөзімізге жауап табасыз. Қазақстандағы жұмыссыздық проблемасы да күні бүгінге дейін шешімін таппаған өзекті тақырып. Бұған қоса, бізде әр аймақта жиі еңбек дауының орын алатыны тағы бар. Өкінішке қарай, қоғамдағы қордаланған бұл проблемаларды шешуге, не болмаса қателікті мойынға алу сынды қадамға қазақ билігі барған емес.
Алысқа бармай-ақ, 2011 жылғы Жаңаөзендегі оқиғаны еске түсірейікші. Жалақысын көтеруді талап еткен қаншама азаматымыз оққа ұшты. Сол тұста билік тарапынан ең болмаса біреуі халықтың алдына шығып, «еңбек дауының туындауы біздің сол проблемаларды дұрыс шеше алмауымыздан болды» деді ме? Ішкі істер министрлігінен, я болмаса Еңбек және халықты әлеуметтік қорғау министрлігінен төбесін көрсеткен жан болды ма? Керісінше, бар кінәні ереуілге шыққан мұнайшыларға аударып, оларды жауапқа тартып, түрмеге жапты.
Жаңаөзен оқиғасынан кейін де қазақстандық биліктің саяси қадамы бүгінге дейін өзгерген жоқ. Бұған таяуда ғана ереуілге шыққан шахтерлардың әрекеті дәлел бола алады.
Халықтың әлеуметтік мәселесі түбегейлі шешілмеді. Керісінше, биліктегілер түрлі айыппұл, төлемдер арқылы халықтың жұқарған қалтасына түсуді тоқтатар емес. Жұмыссыздықпен күресудің орнына, «өзін-өзі жұмыспен қамтығандар» деген статусты енгізген Еңбек және халықты қорғау министрлігі осы статус арқылы жұмыссыздар санын азайтуды көздегендей. Ресми биліктің «өзін-өзі жұмыспен қамтыған» деп жұмсартылып айтылатын статусындағы азаматтардың шынайы жағдайы қандай? Күнделікті ас-суына нәпақасын базар жағалап табушылар, арба итеріп, қора тазалаушылар. Былайша айтқанда, итаршылықпен күнелтушілер, жұмыссыздықтан осындай қадамға барушылар. Кімнің жылы кабинетте жұмыс істегісі келмейді? Кез келген адам қақаған қыста арба сүйреп, 1000 теңге тапқанша, жылы кеңседе отырып, тұрақты жалақы алғысы келеді. Алайда Қазақстанда мұндай мүмкіндік бар ма? Жоғары білімі туралы дипломы бар талай азамат жұмыс таппай сандалып жүр. Ал тұрақты жұмысы жоқ адамның қандай қадамдарға баратыны бесенеден белгілі. Соған қарамастан, Қазақстан билігінің өкілдері бұл проблеманы шеше алмадық деп ешқашан өздерін кінәлі санаған емес. Керісінше, «өзін-өзі жұмыспен қамтығандарға», яғни күнкөрістің ең ауыр жүгін арқалағандарға қатысты заң шығарып, мемлекетке салық төлетудің жолдарын қарастыруда.
Фото: pastinfo.am.ru.
