Асылбек Мусиннің қайтыс болғанына қырық күннен асты
Президент Әкімшілігінің бұрыңғы жетекшісі Аслан МУСИННІҢ үлкен ұлы Асылбек МУСИННІҢ өмірбаяны мен ұстанымдары туралы фильм бірер күн бұрын желіде пайда болды.
Фильмді Асылбектің қырқына орай марқұмды еске алу ретінде оның достары мен туыстары ұсынып отыр. Оның кіріспесінде әкесі ұлының өліміне қатысты мәлімдеме жасады.
Мемлекет қайраткері Аслан Мусин сүйікті үлкен ұлының мезгілсіз қазаға ұшыраған тұсында қайғысына ортақтасып, моралдық қолдау білдірген барша жұртқа алғыс айтты. Оның айтуынша, Асылбек Мусин дүниені танып-білуге талпынып, адам болмысы мен адамзат танымы жөніндегі философиялық ойға ауқымды үлес қосып, өзінің артында мол мұра қалдырды.
«Голландияда Асылбек Мусиннің басшылығымен адамзат тарихында жинақталған гуманитарлық, философиялық, ғылыми ойлар 114 томға топтастырылды, оны зерттейтін және жүйелейтін «Монотеизм институты» құрылды. «Монотеизм институтына» біріккен әлем ғалымдары Құран, Інжіл, Таурат және тағы басқа да киелі кітаптарды оқып түсінетін әмбебап сөздік жасауды жалғастырып жатыр.
Асылбек Мусин және онымен пікірлес достары дүниені танып-білудің рационал монотеизм философиясының методологиясына негізделген жүздеген сағаттық сапалы аудио-видео материалдарын дайындап кетті», дейді ол өз сөзінде.
Асылбек Мусин 1979 жылы туған. Экономика саласы бойынша жоғарғы білім алған ол жастайынан дін мәселесін жан-жақты зерттеген философ ғалым. Оның есімі Қазақтанда «Ізгі амал» пікірлестер клубымен, былайғы жұрт «құраншылар» деп атайтын ислами ағыммен тығыз байланысты. Асылбек Мусин осы ағымның көшбасшы идеологы саналған.
Асылбек Мусиннің әкесі – Аслан Мусин, экономист, белгілі саяси қайраткер. Қазір зейнеткер. 2008-2012 жыл аралығында Президент әкімшілігін басқарды. Сол жылдары ұлының діни уағыздары кеңнен тарала бастады. Кейбір ақпарат көздері Аслан Мусинның жылы орнынан кетуін 2011 жылғы Жаңаөзен қанды оқиғасымен байланыстырды. 2012 жылы Есеп комитетінің басшылығына ауысса, 2014 жылы Хорватияға президенттің шешімімен елші болып кетті. Ол осы жылдың қаңтар айында зейнетке шыққан болатын.
Еске салайық, Аслан Мусиннің ұлы белгісіз жағдайда Латвия астанасы Ригада дүние салғаны туралы 27 желтоқсанда белгілі болды.
Саясаттанушы Талғат Қалиев Telegram-дағы каналында таратқан ақпарат бойынша, Асылбек Мусин 24 желтоқсанға қараған түні 15-қабатта орналасқан пәтерінің терезесінен құлап, алған жарақатынан қайтыс болған.
Қазақстан сыртқы істер министрлігінің хабарлауынша, Асылбек Мусиннің өліміне қатысты тергеу жүргізіліп жатыр.
Фото: Kapital.kz, m-astana.kz.
