Украиналық демографтар 1930-жылдары қазақ халқының 22,4 пайызы аштықтың құрбанына айналды дейді
Фотода: •РГУ ЦГА КФДЗ •Арх. № 5-3466 Баян-Ауыл маңындағы Әулие-Тас үңгірі алдында отырған қазақ жігіті. Павлодар облысы, 1928 ж.
Украинаның ҰҒА-ның демография институты ХХ ғасырдың 30 жылдары ашаршылықтан ең көп зардап шеккен Қазақстан деп мәлімдеді. Екінші орында Украина. Бұл туралы украиналық Уніан ақпараттық агенттігі хабарлады.
Украина ҰҒА М.В.Птухи атындағы демография және әлеуметтік зерттеу институты директоры Александр ГЛАДУННЫҢ айтуынша, 1930-жылдары Украинада 3,9 млн адам аштықтан өлген. Сондай-ақ, А. Гладун саясаткерлер мен БАҚ-ры бұл санды 7,10 тіпті 12 миллионға жеткізетінін айтты.
«Сондықтан да біз ғалым ретінде құрбандардың нақты санын жариялауды жөн санадық», - деді Гладун.
Ғалымдардың есебінше, КСРО көлемінде 1932-1934 жылдары 8,7 миллион адам аштықтан дүние салған. Алайда, демографтар республикалар арасындағы адам шығынын салыстыру ыңғайсыз, өйткені халқының сандары әрқалай еді дегенді айтады. Яғни пайызға шыққанда, Қазақстанның сол бір зұлмат жылдары халқының 22,4 пайызы қырылып қалған. Ал Украина 13,3, Ресей 3,2, Беларусь болса халқының 1,3 пайызынан айырылған.
«Киев бірінші рет ашаршылықтан Украинадан да қатты зардап шеккен ел барын бірінші рет мойындады. Алайда, Қазақстан ашаршылықты геноцид деп танытуға, бұл трагедияны саяси мақсатта пайдаланып отырған жоқ. Ал Украинаның ресми тарихнамасы аштық коммунистік биліктің ұйымдастырған қылмыстық ісі. Саналы түрде этникалық принцип бойынша украин ұлтын жою үшін жасалды деген пікірінен қайтпайды», - деп жазды ресейлік Взгляд басылымы.
Бұнымен қоса, ресми Киев 30-жылдардағы ашаршылықты Ресей тарапынан жасалған гибридті соғыстың нышаны деген болатын. Бұл сөзді Украина президенті Петр ПОРОШЕНКО айтқан еді. Қыркүйек айында БҰҰ-ның Бас Ассамблеясы мінберінен ұйымға мүше елдерді аштықты геноцид деп тануға шақырды.
1932-1933 жылдары Украинаның ғана емес, КСРО-ның негізгі астығы мол өңірлері: Солтүстік Кавказ, төмен және орта Поволжье, Воронеж аймағы, Қазақстан, Батыс Сібір, Оралдың оңтүстігін де аштық жайлады.
Айта кетейік, тарихшылар украиналық демографтардың айтқанын бұған дейін жариялаған. Жалпы өлгендердің саны 7-8 миллион, оның 3-3,5 миллионы украиндар, 2 миллион адамнан Қазақстан мен Қырғыз Республикасында, 2-2,5 миллион адам РСФСР-да дүние салған.
Фото: yvision.kz
